ناس كتييييييييير قوى بتحب تعمل المربى في البيت، وعلشان كده بقدم لك أحسن الطرق اللي بيها ممكن تحصلي على مربى زي اللي بتشتريها.
قبل ما تبتدي في عمل المربات فيه كام نصيحة عايزه اقول لك عليها علشان تاخدي بالك منها وإنت بتعملي المربى علشان تطلع حلوة...
السكر والفواكه
خلّي بالك إن السكر اللي هتعملي بيه المربى يكون نقي مفيهوش شوائب، و كمان الفواكه تكون طازجة.
إناء الطهي
حاولي إنك تستعملي إناء مستدير سميك من الجوانب.
للتقليب
بلاش تستعملي معلقة معدنية للتقليب وحاولي إنك تستبدليها بمعلقة خشب.
على نار هاديه
خلّي بالك إنك تذوبي السكر على نار هادئة وتحاولي إنه يدوب على الآخر وده علشان المربى ماتسكرش قبل ما تغلي.
اوعي تنسي
إنك تضيفي عصير الليمون إليه علشان المربى ماتسكرش منك قوي.
أول بأول
احرصي وإنت بتقلبي المربى إنك تشيلي الريم أول بأول وده علشان المربى يكون لونها رايق وصافي.
البرطمان
بالنسبة بقى للبرطمان اللي هتعبي فيه المربى فده لازم يكون نضيف قوى قوي قوي، وجاف تماما من المياه هو والمعلقة اللي هتستخدميها علشان المربى ماتفسدش بسرعة.
أحكمي الغلق
زي ما بيكتبوا على علب المربات لازم تملي البرطمان على الآخر علشان مايكونش فيه حيز يسمح بدخول الهواء، وخلّي بالك إنك تقفلي الغطاء كويس قوي علشان المربى ماتفسدش بسرعة.
اختبار نضج المربى
علشان تعرفي إذا كانت المربى استوت ولا لأ؟ فيه حاجة ممكن تعمليها وهي إنك تاخدي معلقة من المربى وتحطيها على طبق جاف وتسيبيها شوية لغاية ما تبرد. وبعد كده تشوفي إذا كانت سميكة ولا لأ.
في التلاجة
بعد ما تبرد المربى عبيها في البرطمان زي ما اتفقنا واحتفظي بيها في الثلاجة
بس كده تعالي بقى نشوف طرق عمل أنواع مختلفة من المربى.
::: مربى التين:::
المقادير:
كيلو تين.
كيلو سكر سنترفيش.
عصير ليمونة.
ربع معلقة صغيرة مسحوق قرنفل.
الطريقة:
1- أحضري التين واغسليه وقطعيه إلى قطع صغيرة وحطيه في طبق صيني على هيئة طبقات وبين كل طبقة وطبقة ضعي سكر.
2- اتركيه فترة تتراوح من 2 إلى 3 ساعات لغاية ما يخرج كمية المياه اللي موجودة فيه.
3- بعد كده حطيه على نار هادئة مع التقليب لغاية ما تلاقي السكر اللي فيه ذاب خالص.
4- بعد كده ضيفي إليه عصير الليمون وسيبيه على النار لغاية ما يتعقد مع إضافة القرنفل المطحون إليه. وزي ما اتفقنا إنك تشيلي الريم أولا بأول.
5- لما تلاقي المربى استوت شيليها من على النار وسيبيها لغاية ما تبرد وبعد كده عبيها في البرطمانات ودخليها التلاجة.
:::مربى الجوافة:::
المقادير:
كيلو جوافة.. كيلو سكر سنترفيش حوالي (3 أكواب كبيرة)
ربع كوب مياه.
2معلقة كبيرة عصير ليمون.
الطريقة:
1. اغسلي الجوافة وقطعيها شرائح.
2. بعد كده حطيها على النار هادئة لغاية ما تلاقي إنها بدأت تلين، شيليها من على النار وسيبيها لغاية ما تبرد.
3. وعلشان تتخلصي من البذور اللي في الجوافة صفي الجوافة في مصفاة بس خلي بالك إن المصفاة تكون ذات ثقوب ضيقة.
4. ضيفي السكر إلى ماء السلق والجوافة وحطيها على النار هادئة مع التقليب المستمر لغاية ما يذوب السكر.
5. ضيفي إليها عصير الليمون مع استمرار التقليب لمدة 5 دقائق ونزع الريم اللي بيتكون أولا باول.
6. لما تلاقيها استوت شيلها من على النار وسيبيها لغاية ما تبرد وحطيها في البرطمان اللي إنت مجهزاه زي ما اتفقنا واحفظيها في الثلاجة
ملحوظة: كيلو الجوافة بعد ما يتسلق ويتصفى هيبقى ثلاثة أرباع
:::مربى البلح السماني:::
المقادير:
كيلو بلح سماني.
كيلو سكر سنترفيش.
عصير ليمونة كبيرة.
على حسب الطلب (قرنفل ولوز مقشر للحشو).
الطريقة:
1. اسلقي البلح وقشريه وشيلي منه النوى.
2. احشي كل حبة بلح نصف لوزة مقشرة أو حبة قرنفل.
3. يضاف السكر إلى مياه السلق وسيبيه شوية على النار مع التقليب لغاية ما يدوب السكر ثم ضيفي إليها عصير الليمونة وإنت بتقلبي.. زي ما اتفقنا شيلي الريم أولا بأول.
4. عند بدء المحلول السكري السابق بالغليان حطي البلح.
5. بعد كده سيبي المربى تغلي على النار لغاية ما يتحول لون المحلول السكري إلى لون أحمر غامق ويبقى سميك القوام بس خلي بالك إنك تنزعي الريم أولا بأول.
6. لما تلاقي المربى استوت شيليها من على النار وسيبيها لغاية ما تبرد وحطيها في البرطمان اللي إنت مجهزاه زي ما اتفقنا واحفظيها في الثلاجة.
:::مربى البرتقال:::
المقادير:
نصف كيلو برتقال.
6 أكواب سكر.
2 عصير ليمون.
الطريقة:
1. اغسلي البرتقال واسلقيه لمدة 10 دقائق. وبعد كده اتخلصي من مياه السلق علشان تتخلصي من مرارة قشر البرتقال.
2. اغلي البرتقال من جديد باستخدام مياه جديدة وسيبيه لغاية ما يستوي وبعد كده شيليه من مياه السلق بس المرة دي احتفظي بمياه السلق.
3. قطعي البرتقال إلى 4 أجزاء وإنت بتقطعيه انزعي منه البذور.
4. افرمي البرتقال بمفرمة اللحمة وبعد فرمه ضيفي إليه 4 كوبايات من مياه السلق اللي إنت محتفظة بيها.
5. ضيفي إلى الخليط السابق السكر وضعيه على نار هادئة مع التقليب المستمر لغاية ما يدوب السكر.
6. ضيفي إليه عصير الليمون وارفعي درجة حرارة النار مع التقليب المستمر ونزع الريم أولا بأول.
7. بعد ما تلاقي المربى استوت شيليها من على النار وعبيها في برطمان.
:::مربى اليوسفي والبرتقال:::
المقادير:
كيلو برتقال بسرة.
كيلو يوسفي.
كيلو سكر.
معلقة صغيرة ليمون.
الطريقة:
1. اسلقي البرتقال واليوسفي لمدة 10 دقائق وبعد كده اتخلصي من مياه السلق علشان تتخلصي من مرارة قشر البرتقال واليوسفي.
2. يعاد بعد ذلك سلقه بماء جديد ثم يصفى وتنزع البذور والأعناق.
3. بعد كده افرميه بس خلّي بالك من إنك تحتفظي بالسائل الناتج عن الفرم.
4. ضيفي إلى السائل الناتج عن عملية الفرم السكر واتركيه على نار هادئة مع التقليب حتى يذوب السكر تماما.
5. بعد شوية ضيفي خليط البرتقال واليوسفي المفروم إلى السكر على النار مع التقليب المستمر ونزع الريم أولا بأول.
6. ضيفي عصير الليمون وارفعي درجة حرارة النار واتركيها لتغلي لمدة 5 دقائق.
7. شيلي المريي بعد ما تستوي من على النار وعبيها في برطمانات زي ما اتفقنا.
والف هنـــا وشفــــا
مع تحياتى
11-20-2007, 08:19 PM 
.....ازاي تعملي المربى في البيت......... 
vbphrase[similar_threads] للموضوع: .....ازاي تعملي المربى في البيت......... 
العرض العادي
