مأكولات ** شم النسيم **

[align=center] أكيد كلنا يوم شم النسيم بنحب نفطر بيض ملون، والنهارده هنشوف مع بعض إزاي ممكن نلون البيض بأكتر من لون بطريقة طبيعية ميه في الميه باستخدام الأعشاب الطبيعية والخضروات والفواكه...
لو عايزه تلوني البيض باللون البنفسجي يبقى استخدمي عصير العنب المركز هتلاقيه في "السوبر ماركت" وضيفي إليه كمية كبيرة من ورق البصل الأحمر.
لو عايزه تلوني البيض باللون الأزرق يبقى استخدمي عصير التوت المركز هتلاقيه في "السوبر ماركت" وضيفي إليه ورق الكرنب الأحمر.
لو عايزه تلوني البيض باللون البمبي بدرجاته المختلفة وصولا للون الأحمر يبقى استخدمي البنجر الأحمر وضيفي إليه عصير فراولة مركز وقشر البصل الأحمر وكركديه‏.‏

لو عايزه تلوني البيض باللون الأصفر بدرجاته وصولا للبرتقالي يبقى استخدمي أوراق البصل البرتقالي أو قشر الموالح زي البرتقال أو اليوسفي وضيفي إليه الجزر المبشور أو الكمون أو الكركم‏.
لو عايزه تلوني البيض باللون الذهبي يبقى استخدمي قشر التفاح الأصفر وضيفي إليه أوراق البقدونس.
لو عايزه تلوني البيض باللون الأخضر يبقى استخدمي أوراق السبانخ والبقدونس.
لو عايزه تلوني البيض باللون البني يبقى استخدمي القهوة أو الشاي المغلي.

الطريقة:
دي أبسط وأسهل طريقة ممكن تعمليها علشان تحصلي على الألوان اللي أنت عايزاها...
1. هتسلقي البيض عادي جدا زي ما أنت بتسلقيه.

2. أثناء ما البيض بيتسلق هتملي إناء ميه وتضيفي إليه معلقة صغيرة خل علشان تثبت اللون، بعد كده تضيفي إليها أي إضافات من اللي إحنا قلنا عليها على حسب اللون اللي أنت عايزاه، وتسيبي الميه بالإضافات دي تغلي كويس أكتر من مرة علشان الميه تتلون باللون اللي أنت عايزاه. بعد كده اطفي البوتاجاز...
3. سيبي الميه الملونة لغاية ما تبرد وبعد كده ضيفي إليها البيض المسلوق وسيبيه فيها لمدة خمس دقائق أو لغاية ما تلاقي إن البيض اتلون بلون الميه.

وعلشان يوم شم النسيم يكون فعلا يوم مميز في كل شيء دلوقتي هانقولك على أكتر من طريقة ممكن تستخدميها في تقديم البيض على السفرة يوم شم النسيم....
بس يا قمر دي كانت طريقة تلوين البيض وتقديمه في شم النسيم ودلوقتي تعالي نشوف إزاي ممكن تعملي باقي أكلات شم النسيم


قبل ما نتكلم عن طريقة عمل الفسيخ أو السردين عايزه أقولك على نصيحة مهمة قوي وهي إنك لازم تشتري الفسيخ أو السردين من مصدر موثوق فيه...أما بالنسبة لأحسن طريقة لعمل الفسيخ والسردين والملوحة هي إنك قبل يوم شم النسيم بيوم تجيبيهم وتنظفيهم بالسكينة من القشر الخارجي كويس، وبعد كده تفتحيهم وتنضفيهم من جوه وتقسميهم إلى جزءين وتحطيهم في طبق وترشي عليهم زيت وعصير ليمون وياريت تكتري من عصير الليمون علشان عصير الليمون بيقضي على أي بكتريا ممكن تكون موجودة، وبيخلي ليهم رائحة حلوة وعلى فكرة الزيت والليمون بيضيع نسبة الملوحة اللي بتكون موجودة في الفسيخ أو السردين.
ياريت تجيبيها مغلّفة ويكون لونها ذهبي ومافيش في الجلد أي آثار لأي خدش والعين تكون محتفظة بلمعانها والخياشيم كاملة ومفيش فيها أي علامات للعفن.....ودي أكتر من طريقة لعمل الرنجة
المقادير:
• كيلو رنجة.
• نصف كوب طحينة.
• 4 ثمرات طماطم مقطعة مكعبات صغيرة جدا.
• عصير 3 ليمونات.
• ربع كوب صغير زيت.

الطريقة:
1. هتشوي الرنجة على النار لغاية ما تلاقي إن الجلد اتشقق تماماً... بعد كده حطيها في طبق وابدئي في خليها من الأشواك وتقطعيها قطع صغيرة.
2. هاتِ طاسة وحطيها على النار وحطي فيها الزيت واستني لغاية ما الزيت يسخن، وبعد كده ضيفي إليها الطماطم المقطعة واستني لمدة خمس دقائق وبعد كده ضيفي إليهم قطع الرنجة وعصير الليمون.
3. هاتِ طبق التقديم وحطي فيه الرنجة بالطماطم وبعد كده ضيفي إليهم الطحينة.
ملحوظة ممكن تاكلي الرنجة بالطماطم فقط بدون إضافة الطحينة
المقادير:
• كيلو رنجة.
• عصير 3 ليمونات.
• شرائح ليمون.
الطريقة:
اشوي الرنجة على النار مباشرة لغاية ماتلاقي إن الجلد اتشقق تماماً،بعد كده قسميها إلى نصفين وحطيها في طبق التقديم وابدئي في نزع الشوك منها وضيفي إليها عصير وشرائح الليمون.
لو كنت من الناس اللي مش بتحب الرنجة أو الفسيخ فممكن تعملي لنفسك طبق تونة في منتهى الجمال بس لازم قبل ما تشتري علبة التونة تشوفي تاريخ الصلاحية الموجود على العلبة كويس علشان تعرفي تاريخ الإنتاج وتاريخ نهاية الصلاحية ولازم تكون علبة التونة مفيش فيها أي خدوش، ودي أكتر من طريقة لعمل التونة...

المقادير:
• 2علبة تونة .
• نص برطمان مايونيز.
• حبة فلفل رومي أخضر مقطعة قطع صغيرة.
• معلقة صغيرة شطة حمراء.
• عصير 3 ليمونات.
• بصلة صغيرة مقطعة قطع صغيرة.
• معلقة صغيرة فلفل وملح.
• معلقة كبيرة زيت.
• طماطم مقطعة شرائح "للتزيين"
• عيش بلدي أو فينو.
الطريقة :
هتفرغي علبة التونة في طبق كبير وبعد كده تضيفي إليها باقي المقادير الموجودة عندك وتقلبيهم كلهم مع بعض وتضيفي إليهم شرائح الطماطم. وممكن تاكلي الطبق ده بالعيش البلدي أو بالفينو.

المقادير:
• 2علبة تونة.
• 2 حزمة بقدونس.
• ثمرة طماطم كبيرة مقطعة قطع صغيرة.
• 2 ثمرة فلفل رومي أخضر مقعة قطع صغيرة.
• 1 ثمرة بصل صغيرة مقطعة قطع صغيرة.
• 5 أعواد خس بلدي أو خس كابوتشي.
• 1/8 كيلو زيتون أخضر مخلي أو أسود "اختياري"
• عصير 3 ليمونات.
• معلقة كبيرة ملح وفلفل.
• معلقة كبيرة زيت ذرة أو زيت زيتون.
الطريقة:
هتجيبي طبق كبير وتحطي فيه التونة وبعد كده تضيفي إليها باقي المقادير الموجودة عندك وتقلبيهم كلهم مع بعض. وعلى فكرة الطريقة دي مفيدة جدا للناس اللي بتعمل ريجيم.
أما بقى لو كنت من الناس اللي مالهاش في أي حاجة من الحاجات اللي اتكلمنا عليها قبل كده يبقى عليكِ وعلى الأسماك ودي أكتر من طريقة جديدة لعمل السمك..

المقادير:
• 2 كيلو سمك فيليه.
• أوراق حزمة بقدونس.
• أوراق حزمة كزبرة.
• عصير 3ليمونات.
• نص كوب زيت زيتون.
• نص كوب زيت ذرة.
• نص رأس ثوم, مفرومة.
• ملح وفلفل وكمون.
• أوارق جرجير "للتزيين".

الطريقة:
1. هتخلطي الثوم المفروم مع أوراق البقدونس والكزبرة وبعد كده تحطيهم في الخلاط وتضيفي إليهم كوب صغير ميه و1/4 كوب زيت زيتون وتضربيهم كلهم مع بعض في الخلاط.

2. تبلي السمك بالملح والفلفل والكمون والليمون وسيبيه لمدة نص ساعة،بعد مرور النص ساعة سخني زيت الذرة وحمري شرائح السمك في الزيت لغاية لونها ما يبقى ذهبي.
3. هاتِ طاسة وسخني فيها ربع كوب زيت زيتون، بعد كده ضيفي إليها خليط البقدونس والكزبرة وقلبيهم كلهم مع بعض كويس لمدة خمس دقائق على النار.
4. هاتِ طبق التقديم وحطي فيه السمك الفيليه وضيفي إليه صوص البقدونس والكزبرة. ممكن تزيني الطبق بأوراق الجرجير.
المقادير:
• كيلو ونص سمك فيليه.
• نص حزمة بقدونس مفرومة.
• ربع حزمة كزبرة خضراء مفرومة.
• حبة بطاطس,مسلوقة ومهروسة.
• كوب لبن حليب.
• كوب دقيق.
• عصير 3ليمونات.
• معلقة كبيرة قشر ليمون مبشور.
• ربع رأس ثوم مفرومة.
• كوب زيت عباد الشمس.
• 2 حبة بصل أخضر مفرومة.
• معلقة ملح وفلفل وكمون.
الطريقة:
1. هاتِ السمك واغسليه كويس وبعد كده قطعيه إلى قطع متوسطة الحجم.
2. سخني اللبن وبعد كده سيبيه لغاية ما يبرد وضيفي إليه السمك المقطع، سيبي السمك في اللبن لمدة نص ساعة وبعد كده انشلي قطع السمك من اللبن.

3. هاتِ مفرمة الأكل اللي عندك وحطي فيها قطع السمك والثوم والبطاطس المهروسة وقشر الليمون والبصل الأخضر, والبقدونس والكزبرة, والملح والفلفل واضربيهم مع بعض في المفرمة، بعد كده حطي الخليط في التلاجة لمدة ساعتين.
4. بعد مرور الساعتين طلعي السمك المفروم من الثلاجة وابدئي في تشكليه على شكل كرات متوسطة الحجم وبعد كده حطي الكرات دي في الدقيق بحيث إن الدقيق يغطيها من كل الجوانب وحطيها في صينية ودخليها الثلاجة مرة كمان لمدة نص ساعة علشان تمسك نفسها.
5. هاتِ طاسة كبيرة وسخني فيها الزيت كويس وبعد كده ابدئي في قلي كرات السمك فيها.
6. هات طبق التقديم ورصي فيه كفتة السمك وزيتي الطبق ببعض من أوارق البقدونس أو الجرجير. على فكرة مع الطبق ده ممكن تعملي طبق بطاطس شيبسي أو طبق رز أبيض.
وعلشان أكون عملت كل اللي علي وعلشان شم النسيم يعدي بسلام دي شوية نصائح خدي بالك منها...
خلي عندك وقت كافي بين وجبة الفطار والغذاء علشان تدي لمعدتك فرصة كافية إنها تهضم وجبة الفطار وتكون مستعدة لوجبة الغذاء الدسمة اللي إحنا قلنا عليها.
لازم تشوي الرنجة كويس على النار واوعي تاكليها نية لأن عملية الشواء دي مهمة جدا لأنها بتقتل أي بكتريا ممكن تكون موجودة.
أحسن حاجة ممكن تعمليها في شم النسيم هي إنك تدخلي الليمون في كل حاجة هتاكليها وده علشان تقي نفسك من الإصابة بالحموضة.
بلاش تشربي ميه كتير بعد الغذاء مباشرة أو أثناء الغذاء وده لأنك لو شربتي ميه كتير هتفضلي تشربيها طول النهار وبعد كده هتحسي بتعب، لو حسيتي إنك محتاجة تشربي حاجة بعد الغذاء يبقى اشربي كوب شاي أو سفن أب.
مش معقول تاكلي فسيخ وسردين أو سمك من غير ما تاكلي أي حاجة خضراء معاهم زي الجرجير أو الفجل أو البصل الأخضر أو الخس وعلى فكرة الخضروات دي بتساعد على تخلص الجسم من الملح الزائد وكمان بتساعد على سرعة الهضم بس نصيحة مني لازم قبل ما تاكلي أي حاجة خضراء تغسليها كويس بنفسك بالميه الجارية ويا سلام لو نقعتيها في ميه مضاف إليها معلقة خل لمدة ربع ساعة وبعد كده تشطفيها بالميه الجارية ده هيبقى أضمن.


[/align]